Главная >> СМИ о Парламенте >> Сæрыстыр дзы стæм

Дата: 6 Марта 2010 г.

Название: Сæрыстыр дзы стæм

"Мы горды ею"

Сæрыстыр дзы стæм

Уды хъæздыгдзинад зæххæн дæр сой у, нæртон лæджы дзырд та Хуыцаумæ хъуысы. Æнæмæнг, зондджын, курдиатджын лæг загъта ацы ныхæстæ. Курдиат адæймагæн Хуыцауæй лæвæрд у, фæзæгъынц. Æрдз æй бирæтæн, бæргæ, балæвар кæны, фæлæ сугыл суг куы нæ æвæрай, уæд арт мынæг кæны, куы йыл æвæрай, уæд та — цырендæр. Ацы хорз хъуыдытæ æмæ ныхæстæ хауынц нæ Иры сæрæн, æвзыгъд æмæ уæздан сылгоймæгтæй бирæтæм, фыццаджыдæр та — РЦИ-Аланийы Парламенты Сæрдар Хабыцты Ларисæмæ.

"Иунæг кадджын Хуыцау адæмы алыхуызæттæ уымæн сфæлдыста, цæмæй иутæ зоной иннæты æмæ кæрæдзийæ сæрыстыр уой, фæлæ æцæг адæймаджы удыхъæд банкъарæн ис æрмæст йæ хорз миниуджытæй, рæсугъд хъуыдытæ æмæ æвзыгъд ныфсæй". РЦИ-Аланийы Сæргълæууæг Мамсыраты Таймуразы чиныг "Дæ мæсыг самай"-йæ ист сты ацы рæнхъытæ, æмæ мæм афтæ кæсы, цыма комкоммæ Хабыцты Ларисæмæ хауынц, цыма уый тыххæй фыст сты.

Ларисæ Парламенты алы æмбырдмæ дæр рахæссы, адæм цæмæй фæхъæрзынц, цы сæ фæтыхсын кæны,  ахæм фарстатæ, лæмбынæг сыл æрныхас кæнынмæ. Ивгъуыд æнусы нæуæдзæм азты куыд  уыдис, ахæм дзæгъæл ныхас нал вæййы Парламенты æмбырдты. Ларисæ аргъ кæны нæ фыдæлты зæрдæдаргæ хотых рæстдзинадæн, уарзы йæ æмæ йæ æргомæй фæзæгъы. Уыимæ канд нæхимæ, Ирыстоны, нæ, фæлæ Мæскуыйы дæр. Хъуыды ма йæ кæнын, фарон Мæскуыйы регионты кадртæ æвæрыны æмæ нысан кæныны фарстайы фæдыл куыд æргомæй дзырдта, уый. Раст цыма нæхимæ кадртæ нæй, уыйау, дам, нæм алырдыгæй сæрвитынц бæрнон бынæтты кусынмæ, æмæ сæ цинтæ (чин) сæхирдыгæй куы фæвæййынц, стыр стъалытæ сæм куы 'рхауы, уæд сæ фæд-фæд фæстæмæ цæуæг фæвæййынц.

Алы адæймаг дæр йæ удыхъæды хорз миниуджытæ йæ ныййарджытæй, æфсарм æмæ æгъдау алчидæр йæ мады гуыбынæй рахæссы. Æнæмæнг, Ларисæ дæр хайджын у уыцы хорз миниуджытæй. Уый æххæст ахуыргонддзинад райста Цæгат Ирыстоны Хетæгкаты Къостайы номыл паддзахадон университеты, каст фæци уæлдæр партион скъола дæр.

Ахуыргæнæг, фæскомцæдисон æмæ партион куыстæй райдыдта йæ фæллойадон фæндаг Хабыцты Ларисæйæн. Æвзæрст æрцыд Дзæуджыхъæуы горæты Советы Сæрдарæй дæр. Æмтъеры æмæ знæт нæуæдзæм азты фондз азы дæргъы банкирæй дæр акуыста. Дæс азæй фылдæры размæ республикæйы Парламенты депутат куы сси, уæд æй депутаттæ равзæрстой Парламенты Сæрдары фыццаг хæдивæгæй. Фæстæдæр та сси Парламенты Сæрдар. Хуымæтæджы ахуыргæнæгæй паддзахадон кусæджы бæрнон бынатмæ схызт зæдæнгæс рæсугъд сылгоймаг Хабыцты Ларисæ. Мах, Ирыстоны сылгоймæгтæ, сæрыстыр стæм уымæй. Хуымæтæджы йын нæ саккаг кодта йæ рæстæджы хицауад майдан "Фæллойадон сгуыхтдзинæдты тыххæй", ис æм УФ-йы Паддзахадон Думæйы Федералон Æмбырды Кады грамотæ æмæ æндæр паддзахадон хæрзиуджытæ. Æнцон нæу Парламенты Сæрдары куыст, вазыгджын у, фæлæ йæм Ларисæ хорз арæхсы, хорз фидауы уыцы бæрнон бынаты. Йæ сæйраг хæстæй уæлдай ма æххæст кæны æхсæнадон хæс дæр, у РЦИ-Аланийы гимнастикæйы федерацийы разамонæг. Кæддæр йæхæдæг куыд гуырвидауц уыдис, ахæм æвзонг чызджыты уындæй йæ зæрдæ райы, цин кæны се сгуыхтдзинæдтыл.

Алы аз дæр махæн, Ирыстоны сылгоймæгтæн, Хабыцты Ларисæ зæрдиаг арфæ ракæны Сылгоймæгты Дунеон боны фæдыл. Ацы хатт та йын Ирыстоны сылгоймаг ахуыргæнджыты  номæй хъуамæ мах раарфæ кæнæм: — Ларисæ, Сылгоймæгты бæрæгбоны хорзæх дæ уæд! Сылгоймаджы амондæй хайджын фæдæ æмæ дæ бинонты къордимæ амондджынæй цæр! Царды мидæг алы удæн дæр æппæты стырдæр хæзна у æнæниздзинад, æмæ нын сæдæ азмæ дæ къахы алгъæй дæр макуы схъæрз. Адæмы уарзондзинадæй хайджын дæ, æмæ дæ ноджыдæр сæ хорзæх уæд! Де 'взарджытæ дæ кæддæриддæр разы куыд уой, ахæм амонд дæ уæд. Æнæнизæй, æнæмастæй æмæ æнæфыдбылызæй ма нын бирæ азты фæкус дæ бæрнон куысты.

Лæгты дзуары хорзæх дæ уæд, Ларисæ!

газета "Рæстдзинад" 6 марта 2010г

Председатель Парламента >>
Мачнев Алексей Васильевич
Мачнев А. В.